Helvítis fokking fokk....... :)

Er ennþá með þessa leiðinda magapest. Sit við tölvuna og reyni að nýta þá tímann í að skrifa fyrst ég kemst ekki í hina vinnuna en klýjar stöðugt og er að drepast í maganum . Prófaði í gær að taka tvær mismunandi verkjatöflur við þessu en ekkert virkaði. Vona bara að þetta dragist ekki enn á langinn. Get þó sagt að líðanin er aðeins betri í dag en í gær en það hrellir mig aðeins að Siggi fékk einhverja svona pest á milli jóla og nýjars og hann var í 4 daga og sá 3 var verstur!!! Það sem mér finnst þó leiðinlegast er að ég þurfti að taka þá ákvörðun í morgun ásamt hinum kennaranum í 7. bekk að fresta bekkjarskemmtun sem vera átti á morgun um óákveðin tíma. Það átti að vera með skemmtiatriði fyrir foreldra og gista í skólanum en þar sem óvíst er hvort ég kemst í vinnuna á morgun er ekki hægt annað en að  blása þetta af þar sem ég get heldur ekki undirbúið börnin. Þessvegna segi ég enn og aftur... helvítis fokking fokk!!! og hana nú

Nýja árið byrjar vel

Ég er nokkuð ánægð með það sem liðið er af nýja árinu. Veðrið er búið að vera ágætt og ég er búin að vera dugleg að hreyfa mig, hitta fólk og hafa það gott. Hafði hugsað mér að láta restina af árinu einnig ganga vel.

Eftir tvær vikur fer ég með nemendur mína á Reyki í 5 daga. Ég átti að fara fyrir tæpum 7 árum en þá var ég kasólétt af Ölmu, greindist með meðgöngusykursýki viku áður en ég átti að fara og var kyrrsett... he he. Núna stefnir þó allt í að ég muni komast þangað og verður það örugglega gaman. Ég verð samt að viðurkenna að mig langar minna að fara núna en mig langaði fyrir 7 árum en það er bara vegna þess að nú á ég barn sem ég þarf að skilja eftir í 5 daga. Við mæðgurnar erum dálítið háðar hvor annarri svo ég kvíði aðeins fyrir. Það verður samt nóg um að vera svo ég veit alveg að ég fæ ekki mörg tækifæri til að sakna hennar.

Ég vaknaði í morgun með klýju dauðans en ákvað að hundsa hana og skellti mér í sturtu. Var nýkomin úr henni þegar ég þurfti að æla og í kjölfarið fór ég að finna fyrir magaverkjum. Ákvað því að sleppa því að mæta í vinnuna í dag enda óþarfi að smita alla og vera sjálfur að drepast. Engum er greiði gerður með því. Ætla samt að reyna að nota daginn eitthvað ef heilsan leyfir. Sit við tölvuna núna og ætla að kíkja á bókarskrudduna sem ég er að skrifa. Sé svo til hvað ég hangi í uppréttri stöðu.

Áramótaheit eða ekki áramótaheit

Það eru komin mörg ár síðan ég setti áramótaheit síðast og ég setti svo sem ekki eitthvað formlegt áramótaheit heldur  núna. Ég ákvað hinsvegar að það væru nokkrir hlutir sem mætti alveg endurskoða öðru hverju. Eitt af því sem ég ákvað að gera er að skammast í ræktina eftir áramót...... Verð að viðurkenna að ég var löt í haust og fór bara nokkrum sinnum en það er mér nauðsynlegt að hreyfa mig til að mér líði vel andlega og til að ég falli ekki aftur í offitu en það ætla ég ekki að láta gerast. Ég finn alltaf hvernig ég fæ meiri orku þegar ég hreyfi mig (Siggi vill meina að ég verði ofvirk ... hehe) og líður á allan hátt betur.

Ég ákvað einnig að rækta betur vini mína því samhliða skorti á hreyfingu hef ég verið dálítið löt að fara í heimsóknir í haust. Það er nú ekki eins og þeir eigi allir heima langt í burtu, ein býr t.d. í næstu götu og ég er c.a. tvær mínútur að rölta þangað. Hef samt farið sjaldan síðustu mánuði og bara af einhverri leti og doða sem ég þarf að rífa mig uppúr.

Mér finnast þetta eiginlega fjári góð markmið fyrir nýtt ár. Rækta líkama og sál. Verð hrikalega fit og skemmtileg þegar fer að líða á árið.... he hehe

Svo ákvað ég að halda áfram að vera dugleg að gera eitthvað skemmtilegt með Ölmu. Við höfum verið duglegar að fara saman í gönguferðir, fjöruferðir, spila og fleira og ég ætla að passa upp á að það breytist ekki. Það er mér mjög mikilvægt að eyða tíma með henni við eitthvað sem við höfum báðar gaman að.

Ég ætla líka að stressa mig minna á ryki, drasli og öðru sem mér finnst ég þurfa að ráða bót á núna strax..... Ég er ferleg með það að ég á erfitt með að slaka á og njóta lífsins fyrr en allt er orðið fínt!!!!! Þvílík della en svona var ég alin upp og það er hægara sagt en gert að breyta þessu. Ég byrjaði þó um jólin því ég nennti ekki að þurrka af og ákvað að sleppa því bara..... vá það var ekkert smá erfitt en vitiði bara hvað.... ég lifði það af (ekki að neinn hafi tekið eftir því þar sem það er yfirleitt ekkert svakalega skítugt heima hjá mér... he he he) og ætla að halda áfram að stíga svona baby steps... :)

 

Nýtt ár mikilvægt að horfa fram á við.

Við áttum góðan dag í gær. Sváfum lengi og lágum svo í leti fram undir hádegi. Alla granna (nágrannA) he he kíkti aðeins við og svo skruppum við í búð c.a. 2 mínútur í hádegi. Rétt náðum fyrir lokun. Fengum okkur svo hádegismat og eftir það kom Þorgerður i heimsókn. Krakkarnir nutu þess að leika sér saman og við fórum með þau út og leyfðum þeim að fá stjörnuljós. Við fórum svo og keyptum flugelda en vorum svo sein að flest var búið nema rándýrar kökur og stjörnuljós.... he he Siggi varð frekar fúll en ég benti honum á að nágrannar okkar eru sprengjuóðir og ekkert verra að  horfa á aðra kveikja í peningunum sínum!!!!! Við keyptum því frekar lítið en nóg fyrir Ölmu því hún var skíthrædd við þetta. Eftir þetta var farið i kirkjugarðinn að leita að nokkrum leiðum afa og ömmu Sigga og frænda hans. Við fundum þetta nú allt fyrir rest og vorum þá búin að ganga um stóran hluta garðsins. Alma hafði sérstaklega gaman af því að lesa á krossana og spá í hvað fólkið var gamalt þegar það dó. Hún hefur mikið verið að spá í Ölmu Kareni ömmu sína síðan við fórum með pabba út í kirkjugarð í Keflavík þegar við vorum þar og áðan fór hún að skæla yfir því að hafa ekki fengið að hitta hana..... voða sætt en ég verð að viðurkenna að ég táraðist við þessa umræðu! Við fengum okkur svo smá göngutúr í góða veðrinu og fórum svo heim að undirbúa kvöldmat og skipta um föt. Alma var í rosalega flottum prjónakjól sem ég prjónaði fyrir hana (ja svona á milli þess sem henni varð of heitt og fór þá úr honum og í pils!!!!). Afi og amma úr sveitinni komu í kvöldmat og svo fórum við niður að sjó þar sem var brenna og flugeldasýning. Maður hittir alltaf hálfan bæinn þar en núna komum við svo seint og Alma var svo hrædd við flugeldana að Siggi varð að fara með hana út í bíl. Við hittum samt nokkra og var það gaman. Þegar við komum heim náðum við réttsvo að ganga frá í eldhúsinu þegar Dóri frændi Sigga kom, Ásta Karen konan hans, Eysteinn Bessi og Björgvin ásamt Kötlu gelgju og Katrínu gelgjuvinkonu hennar. Við plötuðum þær til að taka Elínu með á áramótaball á Blönduósi. Þetta er árlegt 16. ára ball og krakkarnir í 10. bekk bíða alltaf spennt því þetta er  fyrsta alvöruballið sem þau komast á. Mér skilst á henni að það hafi verið gaman og er það hið besta mál. Við hin spjölluðum, átum osta og meðlæti, skutum upp og kjöftuðum svolítið meira. Gestirnir fóru klukkan 2 og þá fór Alma að sofa. Hún fékk að fara út með Eysteini sem er 10 ára og vini hans og voru þau (lesist þeir því hún var hrædd og stóð langt frá ) að skjóta upp allskonar smádrasli fyrir utan húsið. Henni fannst mest spennandi að fá að vera úti um nótt og það með spennandi stórum strákum....... hún verður einhverntíman góð :) he he he  he

Heim í dag

Við erum búin að vera fyrir sunnan síðan á annan og erum að fara að græja okkur til heimferðar. Mikið verður gott að komast heim og slaka á!!! Við erum búin að vera í ýmsum jólaboðum og heimsótt fullt af fólki en það er alltaf best að koma heim. Ég þakka öllum þeim sem við náðum að heimsækja fyrir góðar stundir og bið hina afsökunar sem við komumst ekki yfir að kíkja til.

Gleðileg jól til allra sem ég þekki

Hjálparsveitin á Sauðárkróki er með sniðuga fjáröflun. Þeir eru í góðu sambandi við jólasveinana og taka á móti jólapökkum til barna og koma þeim til jólasveinanna sem fara um bæinn á aðfangadag og afhenda þá í eigin persónu!!! Rétt áðan bönkuðu með látum tveir jólasveinar og æddu úr einu herbergi í annað og vöktu gelgjurnar. Þeir hentu mandarínum í alla, sungu jólalag og gáfu Ölmu svo jólapakka sem hún opnaði og er núna að leika sér með innihaldið. Þetta vakti mikinn fögnuð hennar og er alveg bráðsniðugt finnst mér. Gerir biðina aðeins styttri og skemmtilegri. Núna er hún í óða önn að láta stóru stelpurnar stjana við sig svo tíminn verður fljótur að líða. Við verðum heima þessi jól eins og síðustu. Guðrún fósturdóttir mín kom á mánudaginn og í gær kom Waleska (skiptinemi númer eitt....  he he he) með unnustann hann Ægi. Við erum svo með skiptinema númer þrjú... Elínu svo við verðum 7 allt í allt. Ástæðan fyrir því að ég er að grínast með þessi númer er sú að stundum nefnum við Eínu Maríönnu eða ruglumst á einhvern annan hátt og því vorum við að fíflast með það að nú væri bara málið að nota einn, tveir og þrír... he he he ekki að maður myndi gera það í alvörunni en gaman að hlæja að því. Waleska var auðvitað voðalega sátt að vera númer eitt!!!!

Ég óska ykkur annars öllum gleðilegra jóla og farsæls komandi ár og þakka fyrir öll samskipti á árinu sem er að líða.

Ég bara á ekki til orð!!!

Jú reyndar á ég fullt af orðum en spurningin er hvernig maður kemur þeim frá sér á vitrænan hátt og án þess að móðga neinn!!!!

Í fyrsta lagi held ég að þetta sé ekki framkvæmanlegt þar sem eftirlitið með ósæmandi hegðun kennara yrði væntanlega óheyrilega dýrt. Þetta er ansi stór hópur fólks og hvernig ætti að skipuleggja þetta er ofar mínu ímyndunarafli!!!

Í öðru lagi er það stundum smekksatriði hverskonar hegðun er í lagi og hver ekki. Það fer einnig eftir aldri og þroska nemenda svo reglurnar hlytu að verða fáránlega flóknar ef þær ættu að verða þannig að einfalt væri að fara eftir þeim.

Í þriðja lagi er til svolítið sem heitir siðareglur kennara og þar eru leiðbeiningar um hegðun og framkomu sem flestir þurfa ekki að hafa mikið fyrir að fara eftir. Þetta er svona "kommon sence" leiðbeiningar um góða og gilda siði sem flestir tileinka sér hvort eð er og ég held að dugi í flestum tilfellum ágætlega.

Í fjórða lagi eru fleiri starfsstéttir en kennarar sem eru fyrirmyndir barna. Ætlum við næst að setja reglur um hegðun íþróttaálfsins, íþróttafólks, söngvara eða Mikka músar?????

Sér einhver fáránleikann í þessu?????

Flest fólk kann að hegða sér almennilega og veit hvað er við hæfi og hvað ekki. Þeir sem ekki geta það geta lent í erfiðleikum en að taka eina starfstétt á þennan hátt er býsna fáránlegt. Ætli þetta sé uppástunga frá "góðvini" Íslendinga Gordon Brown??????

Kennarar séu fordæmi

Jólin eru að koma...... trallalla....

Ég er ekkert betri en börnin. Helsti munurinn er sá að mér finnst meira spennandi að sjá aðra opna pakka frá mér en að opna mína eigin pakka. Alma er auðvitað orðin voðalega spennt. Á aðfangadag er hefð fyrir því að jólasveinar keyri um bæinn með hávaða og látum. Þeir stoppa síðan hjá sumum börnum og færa þeim gjafir við mikinn fögnuð. Í fyrra vissum við ekki um þennan sið sveinkanna svo þeir stoppuðu ekki hjá okkur en núna er ég viss um að þeir hringja hjá okkur bjöllunni og færa Ölmu gjöf. Ég hef góð sambönd og fékk fullvissu eins þeirra fyrir því . Í gær fórum við í göngutúr um bæinn og hentum inn jólakortum. Við enduðum svo í bakaríinu og fengum okkur rúnstykki og heitt kakó. Engan langaði í köku enda flæðir út úr öllum skápum og dollum af bakkelsi heima. Í gærmorgun bakaði ég lagtertu fyrir Sigga eftir uppskrift sem ég fékk hjá Brynhildi vinkonu minni í Reykjavík. Þessi lagterta er einstaklega góð og í miklu uppáhaldi hjá fjölskyldunni. Við skárum svo út laufabrauð seinnipartinn og Siggi steikti. Hann nennti ekki að skera og Elína og Alma voru svo smámunasamar að ég gerði flestar kökurnar. Hérna er annars búið að gera allt nema skúra gólf sem verður gert á Þorláksmessukvöld og elda jólamatinn. Það er því bara jólastemming og næs þessa síðustu daga fyrir jól.

Gleðileg jól öll sömul og njótið samvista við vini og fjölskyldu.

Alma syngur Heims um ból....

Alma Karen er í söngskóla Alexöndru ásamt fleiri stelpum. Þær tóku núna fyrir jólin upp video við jólalagið Heims um ból. Alma var viðstödd þegar þær sungu en þegar upptakan fyrir myndina var gerð var hún veik í sveitinni hjá afa og ömmu. Það var auðvitað frekar svekkjandi fyrir hana en ef þið farið á Youtube og hlustið á lagið getið þið heyrt hana syngja aðra línuna í laginu en hún hljómar svona: helg eru jól    :)

Slóðin er:

http://www.youtube.com/watch?v=hPRv-k1pvNA

 

Jólastúss

Þá eru bara eftir tveir dagar í jólafrí og þar af bara einn með kennslu. Það er alltaf svo ljúft að mæta á stofujól og eiga notalega stund með krökkunum. Í þetta sinn vona ég að ég hafi tíma til að skreppa á jólaballið hjá Ölmu og ganga í kringum jólatréð með henni í smá stund. Það ætti að ganga ef stofujólin hjá mér dragast ekki of lengi. Ég fór í saumaklúbb í gær eftir að hafa staðið á haus seinnipartinn að baka. Það er oftast gefið frí síðasta þriðjudag fyrir jólafrí frá klukkan tvö til að fólk geti farið heim að  baka og mér hefur heyrst í morgun að stór hluti starfsfólksins hafi notað tímann í það. Ég ætla að nota tímann næstu daga og vinna í bókinni minni svo ég þurfi ekki að nota mikið af jólafríinu í það. Það er samt ljóst að eitthvað þarf ég að vinna í jólafríinu en það er svo sem allt í lagi. Eftir vinnu á föstudag ætlum við Alma að setja upp jólatréð og þá verða spiluð jólalög og borðaðar smákökur. Það er alltaf skemmtileg stemming og ég hlakka til.