Bráðum suður í fjörið

Það er alltaf að styttast í þessa helgi!!! Ég hlakka svo til að koma suður um helgina því ég hef ekki eytt helgi í Keflavík síðan í lok ágúst!!! Það er of langt fyrir mig. Þess utan kom ég yfir nótt í október en hafði lítinn tíma til að hitta vini og ættingja því þetta var vinnutengt. Við Siggi komum einnig suður í byrjun nóvember því þá var árshátíð í vinnunni hjá honum og gist á hóteli í bænum. Ég er virkilega komin með þörf fyrir rauðvín og spjall við vinkonurnar. Tilefni fararinnar er að Friðrik "litli" bróðir er að ferma miðsoninn, Jón Stefán á sunnudeginum og við látum okkur auðvitað ekki vanta í veisluna. Ferðin verður auðvitað notuð einnig til að kíkja í búðir og gera eitthvað skemmtilegt. Alma er búin að panta að fara í sundlaugina í Keflavík. Hún er að hluta til innilaug með rennibrautum og fleiru skemmtilegu fyrir krakka svo það er tilvalið að fara þangað á veturnar því þá er svo gaman að geta farið í sund þó það sé kalt úti. Þegar maður er með svona veikindapésa eins og hana þýðir ekkert að fara í sund á veturnar nema í innilaug. Það er einnig plönuð ferð á skauta í skautahöllina því við fórum á skauta á Akureyri fyrir jól og Alma fékk bakteríuna. Svo að sjálfsögðu ætlum við að reyna að heimsækja sem flesta vini og ættingja.

Offita í New York

Þar sem ég renndi yfir fréttir dagsins stoppaði ég sérstaklega við að í New York ætli menn að fara að berjast við offitu. Planið er að koma upp grænmetisstöndum úti um víðan völl í þeim hverfum þar sem offita og heilsufarsvandamál eru algengust. Menn hafa nefnilega komist að því að tíðni er á milli offitu og aðgengi að grænmeti og ávöxtum. Nú efast ég ekkert um að eitthvað er til í því en er málið endilega alveg svo einfalt? Vissulega er betra að þurfa ekki að fara langt til að kaupa hollan mat en maður þarf líka að vilja borða hann og svo má ekki gleyma mikilvægi hreyfingar. Oft hefur nefnilega líka verið sýnt fram á það í rannsóknum að bestur árangur næst þegar fólk eykur hreyfingu ásamt því að gæta að mataræði. Getur ekki verið að í þessum hverfum New York (sem kom fram að væru oft fátækari hverfi) sé framboð líkamsræktar minna og ólíklegt að fólk stundi ódýra líkamsrækt eins og skokk þar sem hættan á ránum er væntanlega meiri í fátækari hverfum!!! Þetta eru bara smá vangaveltur og engar fullyrðingar

Skrapp í kaffi og endaði í mat!

Við mæðgur komumst báðar út úr húsi í dag í fyrsta skipti í viku og var það mikill léttir fyrir okkur báðar. Það hvarflaði því ekki að okkur að fara beint heim heldur kíktum við í heimsókn til Dóru og hittum þar einnig Þorgerði. Það var mikið stuð enda til samans um að ræða 4 krakka frá nokkurra mánaða til 5 ára. Dóra var svo almennileg að bjóða okkur í mat svo við ílengdumst hjá henni. Frábær matur og takk kærlega fyrir okkur Dóra!!

Veikindi og vorið

Við mæðgur erum búnar að vera veikar til skiptis í allan febrúar. Fyrst hún, svo ég, svo sló henni niður og sama dag sló mér niður!!!!!! Ég segi nú bara að það er gott að febrúar er að renna sitt skeið á enda  !!! Það er strax komin smá vorhugur í mig því maður er farinn að sjá ljósrönd á himni þegar maður skellir sér í vinnuna á morgnanna og svo er dagsbirtan orðin umtalsvert meiri seinnipartinn. Þetta er alveg að koma og ég, þetta mikla vorbarn sit spennt og stari í blómabeðin og bíð eftir að krókusarnir fari að skjóta upp kollinum. Ásamt björtum morgnum er það að mínu mati skemmtilegasti vorboðinn. Það er svo gaman að sjá náttúruna vakna til lífsins, fara í göngutúra með stelpunni í náttúruna og benda henni á brunhnappa og farfugla. Mhhhhh ég get ekki beðið en fyrst ætla ég á skíði um páskana. Stóra systir ætlar að vera heima og kenna litlu systur á skíði. Ég veit ekki alveg hvor þeirra er spenntari og svo má ekki gleyma skiptinemanum frá Þýskalandi sem hefur aldrei komið á skíði og ætlar að prufa líka. Það eru skemmtilegar vikur framundan og margt til að hlakka til.

Laun kennara

Ég gat ekki á mér setið um daginn og svaraði bloggi sem kom til út af því að bæjarstjórinn á Seltjarnarnesi hafði farið að ræða það að hækka þyrfti laun kennara. Þessu svarar síðan kona ein sem ekki virtist vita mikið um störf eða kjör kennara og í kjölfarið mátti sjá fólk tjá sig ýmist með eða á móti þessari konu. Það sem mér fannst verst að sjá var heiftin sem sumir bjuggu yfir, vanþekkingin og fordómarnir ásamt þeirri staðreynd að því miður virðumst við kennarar alltaf þurfa að réttlæta vinnutíma okkar. Það er árið 2008 og ennþá er fólk sem heldur að kennarar séu farnir heim um hádegi og liggi síðan í sólbaði hálft árið á borgarstjóralaunum!!!! Staðreyndin í málinu er sú að kennarar eru með lægri laun en sambærilegar stéttir (þegar við berum saman menntun og ábyrgð) og hafa verið lengi. Þetta ástand hefur farið versnandi síðustu ár svo nú er komið þannig í mörgum grunnskólum að fella verður niður kennslu eða pína kennara í miklu meiri kennslu (sem sagt aukavinnu fram yfir fulla vinnu) en þeir eru jafnvel tilbúnir til að taka. Vandræðaástand hefur skapast í nokkrum skólum á höfuðborgarsvæðinu í vetur og sjá skólastjórar fram á að ef ekki verði hækkuð launin verulega muni margir hætta í kennslu og fara í önnur störf þar sem vinnu líkur klukkan 16 (en ekki þarf að taka með sér búnkann af verkefnum heim) og betri laun fást auk þess sem álagið er minna. Kennsla er mjög fjölbreytt og skemmtilegt starf en vinnudagurinn er oft langur og maður kemur bæði andlega og líkamlega þreyttur heim.  Álagið sem fellst í kennslu er erfitt að útskýra fyrir þeim sem ekki hafa reynt það. Það má segja að fyrir þá sem ekki hafa neina hugmynd væri hægt að líka þessu við barnaafmæli. Maður er með stóran hóp af börnum sem eiga að gera ákveðna hluti og maður þarf að hafa stjórn á því að það sé gert og allir séu glaðir. Það þarf að undirbúa afmælið og ganga frá eftir veisluna því afmælið gerir sig ekki sjálf. Þetta er það sem sumir halda við kennslu.... að við vinnum bara á meðan við erum að kenna börnunum en það er ekki nema um helmingur tímans. Það þarf auk þess að skipuleggja fyrir hvern tíma hvaða efni á að kenna í þessum tíma, lesa það yfir (stundum ryfja það upp sjálfur og æfa sig ef maður er farin að ryðgja í viðkomandi efni), nú svo þarf að fara yfir vinnubækur og verkefni, ritgerðir og próf að ógleymdum samráðstímum við aðra kennara. Venjan er sú að kennarar hittast vikulega sem kenna sama árgangi sama námsefni svo flestir kennarar eru með nokkra samráðstíma á stundatöflu. Fyrir utan þetta er svo samstarf við foreldra, skráning í tölvukerfi og umsýsla við umsjón, samráð við skólastjórnendur, fundir, námskeið, teymisfundir og fleira. Þegar klukkan er orðin 16 hefur dagurinn oft ekki farið í annað en kennslu og fundi og þá á eftir að fara yfir verkefni eða undirbúa kennslu. Það þarf því að gerast eftir vinnu og lengir vinnudag kennara ennþá frekar. Þess vegna sárnar kennurum þegar fólk heldur að við vinnum ekki vinnuna okkar því oft erum við að vinna meira en þeir sem vinna frá 8 - 16.

Það dettur engum í hug að fréttamenn vinni bara hálftíma á dag á meðan á útsendingu stendur eða að prestar vinni bara á meðan á messu á sunnudögum stendur. Af hverju eru það bara kennarar sem þurfa stöðugt að segja fólki að það sé líka vinna utan kennslu? Heldur fólk bara að við göngum inn í kennslustund og vitum alla hluti? Munum þá síðan í grunnskóla? Þurfum ekkert að spá í hvað á að kenna í hverjum árgangi eða í hverri kennslustund? Heldur fólk að ritgerðir, verkefni og vinnubækur fari yfir sig sjálfar? Flestir skólar nota Mentor til að halda utan um skólastarfið. Heldur fólk að upplýsingarnar þar skrái sig sjálfar? Hvað með þegar fólk er að hringja í kennarann eða hann í foreldra? Þetta tekur allt tíma og er hluti af vinnunni okkar.

Æi ég þurfti bara að fá smá útrás

Ný bloggsíða

Ég hef verið með nokkrar bloggsíður og þær hafa verið misgóðar. Núna ætla ég að prufa moggabloggið og hef lofað að skrifa reglulega svo vinir mínir og ættingjar sem eru ekki hér fyrir norðan geti fylgst með því sem ég er að gera og kíkt á myndir af okkur. Núna sit ég bara í náttfötunum og nenni ekki að drífa mig í sturtu en það er engin miskunn með það því bráðum byrjar sunnudagaskólinn og Alma hefur gaman af að fara þangað. Hún mun því reka mig út sturtaða eða ekki og ég hef ekki gaman af að mæta þar eins og lufsa svo ég hef þetta ekki lengra í bili heldur fer og sjæna mig aðeins til. Skrifa meira seinna í dag og bið að heilsa öllum.