Þorrablót og Dóra um helgina :)

Ég hlakka til helgarinnar enda nóg um að vera. Það er þorrablót á föstudaginn úti á Skaga og við skötuhjúin ætlum á það ef heilsan mín leyfir. Ég var að reyna að fá Sigga til að fara þó ég væri slöpp og vildi helst vera heima en nei nei bæði þurfum við að vera píslavottar því hann vill ekki fara nema ég komi líka og ég vil endilega að hann fari og gæti því pínt mig til að hann missi ekki af þorrablótinu..!!!! Það á eftir að koma í ljós hvernig þetta fer. Ég er búin að pína mig í vinnu alla vikuna þrátt fyrir að ég hefði frekar átt að vera heima (samkvæmt læknisráði) og mig langar takmarkað til að mæta með rautt nef og þrútin og bólgin, rauðleit augu á þorrablót og hósta svo og hnerra yfir matinn hjá öðrum. Mátulega geðslegt :)

Á laugardaginn kemur svo Dóra vinkona loksins aftur á Krókinn og þá ætlum við að fá okkur smá rósavín á náttfötunum áður en hún skellir sér upp í rúm. Hún gistir hjá mér með helminginn af gríslingunum og Hallgrímur hjá pabba sínum með hinn helminginn. Á sunnudeginum verður svo nóg að gera að bera allt draslið inn í hús :) Á mánudaginn ætlum við Dóra og Þorgerður svo að kaupa okkur 3ja mánaða kort í ræktina (ég kalla það bikinikortið.... !!!!!!) og vera duglegar fram á vorið. Á sumrin er svo miklu skemmtilegra að fara bara í sund, út að hjóla, vinna í garðinum og fara í göngutúra.

Núna ætla ég í bælið með nýju bestu vinum mínum þeim hr. pensilíni og frú paratabs...... he he he góða nótt

Tíðindalítil helgi

Um helgina "naut" ég þess að vera veik án þess að þurfa líka að vera að vinna innan um fullt af fólki. Hékk í rúminu fram að hádegi og las og tók því svo rólega yfir daginn. Það breytti engu... ég er alveg jafn lasin og ég er búin að vera síðustu viku en mætti samt í vinnuna . Þetta er óþolandi, ég er búin að vera hóstandi og með kvef í rúma viku og ekkert gengið að batna.... arg... garg...  óp...´öskur.... vein .. og læti :) he he he

Ég fór á Ífufund í gærkveldi þar sem við ákváðum 6 að fara í vorferðina. 2 eru óákveðnar eða búast ekki við að fara. Þetta eru snilldarferðir þar sem dekri, mat, menningu, víni og óvæntum atburðum er raðað saman í frábæra húsmæðraorlofsferð í 3 nætur...... !!!!! Mæli hiklaust með þessum ferðum þar sem þær hlaða batteríin í marga mánuði á eftir. Þar sem margt er gert eru ferðirnar hins vegar ekki sérlega ódýrar og við erum vanar að safna frá hausti en núna höfum við mun skemmri tíma til að safna en það verður ekki vandamál. Í fyrra fórum við á Akureyri, vorum í bústað, fórum með snjótroðara á Kaldbak og renndum okkur niður á snjóþotum, fórum í leikhús, út að borða, pottinn, föndur og söfn ásamt fleiru. Ég hlakka mikið til að fara næstu ferð sem verður væntanlega 23. - 26. apríl. Afmælið hennar Ölmu er einmitt 26. svo það verður nóg að gera hjá mér þegar ég kem heim aftur að undirbúa afmælið hennar og taka á móti gestum.

Á morgun er svo prjónakaffi og þá er ekki spurning að maður mætir og spjallar við vinnufélagana yfir prjónunum.

Umskurður er sorglegur

Sorglegast er að seint gengur að fræða fólk um umskurð í þeim löndum þar sem hann tíðkast. Sum staðar eru stúlkur umskornar vegna þess að menn trúa því að þær verði ekki "hreinar" og hæfar til giftinga fyrr en eftir umskurð en annars staðar eru þær umskornar vegna þess að margra alda siðvenja krefst þess. Í einhverjum tilvikum er þetta gert til að koma í veg fyrir að þær geti notið kynlífs. Sjálfsagt eru fleiri ástæður en það sem ég hef lesið um umskurð er á þessum nótum. Umskurður getur verið allt frá því að "bara" snípurinn er fjarlægður í það að allur ytri hluti kynfæra kvenna er skorinn í burtu. Gjarnan er þetta gert úti í skógi eða við óviðunandi hreinlætisaðstæður, með óhreinum rakvélablöðum og stundum blæðir stelpunum út. Venjulega eru þær skelfingu lostnar og oft á tíðum eru þær mótmæltar umskurðinum en foreldrar og fjölskylda ásamt samfélaginu neyðir þær í þetta. Fræðsla fólks hefur aukist á þann hátt að stelpurnar eru að byrja að gera sér grein fyrir því að þetta er ekki venja annars staðar og þykir alls ekki sjálfsagt. Margir njóti lífsins þrátt fyrir að vera ekki umskornir og þessvegna eru sífellt fleiri stúlkur mótfallnar en mæður þeirra eru hræddar um að þær gangi ekki út ef þær láta þetta ekki yfir sig ganga. Það finnst manni sérlega merkilegt þegar í hlut á fjölskylda sem hefur búið til fjölda ára í vestrænu samfélagi og sér fólk lifa venjulegu lífi, eignast börn og njóta lífsins..... ÁN umskurðar!!!! Ég gæti betur skilið þessa fjölskyldu ef hún byggi í Súdan en það er alls ekki málið....... ég vona bara að sem flest börn sleppi við þetta í framtíðinni :)

Danmörk: Dæmd fyrir að láta umskera dætur sínar

Helgarfrí

Ég kom heim í gær frá Reykjum eftir vel heppnaða ferð. Krakkarnir höguðu sér vel og skemmtu sér frábærlega. Þessi reynsla á örugglega eftir að fylgja þeim lengi og minningarnar ylja þeim þegar þau hella sér út í að fjölga vinunum á msn :)

Ég var veik allan tímann á Reykjum en hélt því þokkalega niður með Paratabs.... takk þeim sem fann það upp :) Skellti einnig í mig hóstamixtúru og hálstöflum eftir þörfum. Í dag er ég búin að vera hálf slöpp og því gert lítið af viti. Skellti mér þó í Skaffó að skoða myndavélar því ég fékk nóg af minni á Reykjum. Hún er bara einfaldlega orðin frekar slöpp greyið. Ég ætti að eiga fyrir nýrri um næstu mánaðarmót en annars um þarnæstu svo mér datt í hug að skreppa og kíkja svo ég vissi hvað ég þyrfti mikinn pening. Væri svo sem alveg til í að eiga rándýra "professional" vél en tími því örugglega ekki í þessu lífi :) he he

Er búin að vera að prjóna Baby Born peysur fyrir Ölmu til að gefa í afmælisgjafir. Hún á eftir að fara í slatta af stelpuafmælum í bekknum sínum og það má bara kaupa afmælisgjöf fyrir 500 kall. Það er mjög erfitt að finna eitthvað fyrir þann pening svo mér datt í hug að búa til svona gjafir fyrir hana. Ég er þegar búin að búa til peysu og buxur fyrir hana og Örnu dúllu (vinkonu hennar) og svo eru komnar 7 peysur aukalega.

Jæja þá er bóndinn kominn heim og vinur hans á leið í mat... já Dóra.. Hallgrímur ætlar að borða með okkur lambabóg og kindahrygg... nammi nammi namm.... bráðum getur þú líka borðað með okkur :) he he he

Reykjaskóli í Hrútafirði

Þá er ég stödd á Reykjum og það er dagur 2 !!! Fyrsti dagurinn gekk alveg bráðvel þó fyrirsjánlegir hlutir eins og einhver veikindi og heimþrá hafi örlítið gert vart við sig. Krakkarnir hafa verið að  blandast hinum skólunum sem eru jú alltaf eitt aðalmarkmiðið og þau eru stillt og hegða sér vel. Við vorum ægilega ánægð í morgun þegar okkar skóli var sá eini sem mætti stundvíslega í morgunmat!!!! Það þurfti að bíða í 10 mínútur eftir nokkrum syfjuðum úr hinum skólunum :) he he he svo sem ekki skrýtið eftir fyrstu nóttina... þá er spennandi að pískra fram eftir nóttu :)

Við erum líka búin að vera ótrúlega heppin með veður. Það er milt, stillt og bjart!!!!! Gerist ekki betra í janúar og við vonum bara að það haldist svona. Meira seinna, það er að koma hádegismatur og það er eins gott að sýna gott fordæmi og mæta á réttum tíma... he he

Ég skrifa og skrifa og svo er að pakka á eftir

Ég er búin að vera dugleg um helgina, hef skrifað og leiðrétt og lagað í bókinni enda þarf ég að skila af mér því sem ég er búin með í kvöld :)

Þarf svo að pakka á eftir svo allt draslið sem fer á Reyki verði tilbúið. Ég er viss um að þetta verður miklu meira dót en ég á von á þegar allt er komið í töskuna. Mér finnst nefnilega betra að hafa of mikið með mér en of lítið svo ég á von á að fylla a.m.k. heila ferðatösku... he he he

Ég ætla að taka með mér bunka af verkefnum til að fara yfir því það styttist í annarskil og ég var að fá verkefni hjá 9. bekk sem er mjög seinlegt að fara yfir. Það tekur mig óratíma að fara yfir þetta en svona er það bara,... partur af programmet!!

Þegar ég kem heim frá Reykjum býst ég við að við skreppum í sveitina til að sækja Ölmu þar sem hún verður þar mestalla næstu viku. Það er svo erfitt að hafa hana heima því Siggi er að vinna svo óreglulega og stelpurnar eru oft í skólanum langt fram á dag og lengur heldur en hún er í gæslu. Ætli við gistum ekki eina nótt eða jafnvel tvær í sveitinni og slöppum af. Ég hugsa að ég þurfi að sofa og sofa og sofa og sofa :) he heh e

Bloggleti

Ég verð að viðurkenna að eftir að ég fór að leika mér á facebook í haust hef ég bloggað aðeins minna enda miklir tímaþjófar á ferð. Það er búið að vera mikið að gera hjá mér undanfarið við að skrifa í bókinni og svo að undirbúa ferð á Reyki með nemendur í 7. bekk. Við leggjum af stað næsta mánudag og komum heim á föstudeginum. Ég mun því líklega ekki blogga mikið á meðan enda næg dagskrá frá morgni til kvölds. Það verður verra að hafa ekki litlu snúlluna mína til að knúsa á hverju kvöldi en hún verður bara knúsuð í klessu þegar ég kem heim aftur. Líklega verður hún nokkra daga í sveitinni hjá afa og ömmu á meðan og hjálpar afa í húsunum. Gelgjurnar verða að ganga nokkuð sjálfala á meðan en Siggi verður að vísu með annan fótinn heima og getur fjarstýrt þeim. Meira seinna.

Einhverfa og einhverfa

Mér hefur þótt sjónvarpið gera góða hluti undanfarið með umfjöllun sinni um einhverfu því margir vita lítið um hana. Ég held að það sem flestir átti sig ekki á er að einhverfan er mjög misjafnlega alvarleg hjá fólki og því hefur hún mismikil áhrif á líf fólks. Á síðasta ári greindist einstaklingur í minni fjölskyldu með einhverfu og þá fór ég á netið og fleiri staði til að afla mér upplýsinga um einhverfu. Ég vissi svo sem eitt og annað því sem kennari hafði ég kennt einhverfum einstaklingum en ég vissi að þeir voru mjög ólíkir. Það sem kom mér mest á óvart þegar ég fór að kynna mér málið var að um helmingur einhverfra einstaklinga nær ekki góðum tökum á málinu og verður það að teljast ansi mikil fötlun ein og sér. Það að gera sig skiljanlegan er svo stór hluti af lífi okkar að maður á bágt með að setja sig í þau spor að geta lítið átt samskipti við aðra eða kannski bara einhverja sem eru sérþjálfaðir eða vanir samskiptum við mann. Annað sem kom mér á óvart var að tæpur helmingur einhverfra greinist með einhver þroskafrávik þó ég vilji leyfa mér að setja fram þá tilgátu að kannski eigi tjáningarhamlanirnar einhvern þátt þar. Þannig að burtséð frá endurteknum hreyfingum og erfiðleikum sumra einhverfra að mynda tengsl við aðra þá er ljóst að einhverfan getur haft heilmikil áhrif á líf fólks, mismikil, en alltaf þónokkur. Ég fagna því að fleiri sem hafa beðið greiningar fái hana því það er heilmikið hægt að gera fyrir einhverfa til að gera líf þeirra betra ef fagfólk er með í ráðum. Til þess að svo sé þarf hinsvegar greininguna.

Einhverf börn greinast loks

Þetta er eins og atriði í lélegri bíómynd!!!!

Ég gat alveg séð þetta allt fyrir mér og eins og í bíómynd fékk ég samúð með blessuðum börnum þessara ólánsömu hjóna en gat ekki annað en brosað út í annað yfir hvernig allt fór.... hi hi hi hi

Kveikti í eiginmanninum

Fyrirhyggjulausir ferðamenn

Þetta er dæmigert fyrir suma ferðamenn sem koma til Íslands. Þeir annaðhvort gera sér ekki grein fyrir hættunum eða hundsa þær vísvitandi. Maður sér fólk keyra á smábílum inn á hálendið, sumir eru illa klæddir og hætta á að þeir ofkælist og aðrir fara óvarlega við fossa og aðra staði þar sem nauðsynlegt er að gæta sín svo maður tali nú ekki um þá sem æða eitthvað burt og týnast. Mikið vildi ég að fólk kynnti sér betur hættur og læsi á viðvörunarskilti!!!

Sluppu naumlega þegar Geysir gaus